بولٹن کی سیاسی تاریخ میں پہلے پاکستان نژاد میئر چوہدری اختر زمان نے ذمہ داریاں سنبھال لیں – Kashmir Link London

بولٹن کی سیاسی تاریخ میں پہلے پاکستان نژاد میئر چوہدری اختر زمان نے ذمہ داریاں سنبھال لیں

بولٹن (محمد فیاض بشیر) بولٹن کی سیاسی تاریخ میں پہلے پاکستان نژاد کونسلر چوہدری اختر زمان نے نئے میئر کی حیثیت سے ذمہ داریاں سنبھال لی ہیں بولٹن برطانیہ کا سب سے بڑا ٹائون ہے جس میں پہلی بار ایک مسلمان ایشیائی نے میئر بن کر تاریخ رقم کی اور میئر کا اعزازحاصل کیا ،حلف برادری کی تقریب میں پاکستان قونصل جنرل مانچسٹر طارق وزیر اور پاکستان سے آئے ہوئے چوہدری محمد زمان جاتریا ایڈووکیٹ سابق بار ایسوسی ایشن کھاریاں کی خصوصی شرکت کے علاوہ مقامی کمیونٹی کی ایک بڑی تعداد موجود تھی۔

کونسلر چوہدری اختر زمان کا آبائی تعلق جاتریا تحصیل کھاریاں ضلع گجرات سے ہے وہ 1985ء کی دہائی میں برطانیہ آئے ابتدائیل طور پر مقامی سطح پر محنت مزدوری کے ساتھ ساتھ تعلیم حاصل کرنے کا بھی شوق تھا جس کے نتیجے میں انہوں نےسب سے پہلے بولٹن کالج سے ایڈوانز انگلش لینگوئج کا کورس کیا۔ 1991ء میں بولٹن یونیورسٹی سے گریجویشن مکمل کی 1995ء میں نیبرہڈ کے تحت چلنے والے منصوبوں میں ڈویلپمنٹ پراجیکٹ آفیسر کے طور پر کام کیا۔ 1998ء میں پہلے پاکستان نژاد مجسٹریٹ بننے کا اعزاز بھی حاصل کیا۔ ان کا تعلق ایک سیاسی گھرانے سے ہے جس کے باعث انہیں بچپن ہی سے سیاست کا شوق تھا وہ اپنے حلقے کے لوگوں کا بڑا احساس رکھتے تھے کسی بھی مشکل وقت میں ان کا بڑھ چڑھ کر ساتھ دیتے تھے اس طرح ان کی عوامی مقبولیت میں اضافہ ہوتا چلا گیا انہیں اس بات کااندازہ نہیں تھا کہ کس قدر انہیں عوامی پذیرائی ملے گی۔

حلقے کے عوام کے بار بار اصرار پر انہوں نے1994ء میں لیبر پارٹی میں باقاعدہ شمولیت اختیارکی اور عملی طور پر سیاسی میدان میں اترنے کا فیصلہ کیا۔ اس سال وہ ساتویں مرتبہ بلدیاتی انتخابات میں کامیابی حاصل کرکے میئر منتخب ہوگئے۔ ان کی اس شاندار کامیابی پر نہ صرف برطانیہ بلکہ پاکستان سے بھی ان کے عزیزو اقارب اور دوست احباب کے مبارکباد کے پیغامات موصول ہوئے ہیں جبکہ نو منتخب میئر کی رہائش گاہ پر بھی مبارکباد دینے کاسلسلہ جاری ہے۔ نومنتخب میئر نے اس عزم کا اظہار کیا کہ وہ بحیثیت میئر تمام کمیونٹیز کے درمیان اتحادو اتفاق کی فضا کوقائم رکھتے ہوئے دونوں تہذیبوں کے تعلقات مستحکم اور مزید قریب کریں گے اور کوشش کریں گے کہ تمام کے ساتھ بہتر ریلشن شپ قائم کریں۔ انہوں نے کہا کہ وہ مقامی چیرٹی بولٹن، ہاسپس، فورٹ ہالس، بولٹن ونڈرس اور گرل گائنڈنگ کیلئے کام کرتے ہوئے اس کی بھرپور سپورٹ کریں گے۔

اس موقع پر بولٹن کے مختلف سیاسی سماجی اور مذہبی رہنمائوں نے نومنتخب میئر چوہدری اختر زمان کو مبارکباددیتے ہوئے اسے پاکستان کمیونٹی کیلئے فخر قراردیا اور کہا کہ کمیونٹی کے اندر اتحاد و اتفاق کی فضاہو تو ایسی کئی کامیابیاں ہمارے قدم چومیں گی۔ انہوں نے کہا یہ پہلا موقع ہے کہ بولٹن کونسل میں ایک پاکستانی کو میئر بننے کا اعزاز حاصل ہوا ہے۔ خیرمقدم کرنے والوں میں تحریک حق خودارادیت نارتھ ریجن کے چیئرمین سالار ممتاز احمد چشتی، کنزرویٹو مسلم فورم نارتھ ویسٹ کے چیئرمین راجہ محمد ادریس، انٹرنیشنل تھینکر فورم کے چیئرمین ڈاکٹر غلام سرور اشرف، سابق کونسلر راجہ انصار حسین، راجہ محمد فرید، کونسلر مدثر دین، کونسلر خرم رئوف، پی پی پی بولٹن کے صدر چوہدری ندیم اقبال سمیلہ، حاجی ناصرمحمودشیر،نوید بھٹی، حافظ محمدعباس، چوہدری بابر علی، چوہدری قیصر محمود، چوہدری لیاقت علی، چوہدری محمد رفاقت، راجہ جلیل الرحمٰن، چوہدری مظہر علی اور دیگرشامل ہیں۔

50% LikesVS
50% Dislikes