لاہور (نمائندہ خصوصی)برطانیہ کے ماہر قانون دان اور پاکستان مسلم لیگ ن کے چیف کوآرڈینیٹر انٹرنیشنل افیئرز اینڈ اوورسیز پاکستانیز بیرسٹر امجد ملک نے آج لاہور میں وزیراعظم پاکستان میاں محمد شہباز شریف سے خصوصی ملاقات کی،ملاقات میں باہمی امور اور تارکین وطن کے مسائل پر گفتگو ہوئی، وزیراعظم پاکستان نے اوورسیز پاکستانیوں کو ملکی سفیر قرار دیا ۔
بیرسٹر امجد ملک نے وزیراعظم پاکستان میاں محمد شہباز شریف کی کاوشوں کو سراہا اور کہا کہ مسلم لیگ ن بھاری سیاسی قیمت ادا کرکے ریاست کی آبیاری کی ہے۔بیرسٹر امجد ملک نےبات کرتے ہوئے کہا کہ انہوں نے اس سے پہلے بھی وزیراعظم پاکستان میاں شہباز شریف،وزیر خزانہ اسحاق ڈار اور گورنر پنجاب بلیغ الرحمان سے دسمبر ۲۰۲۲ میں اپنی ملاقاتوں میں اوورسیز پاکستانیوں کی تنظیم سازی،اوورسیز پاکستانیوں کے لیے مخصوص نشستوں کا قیام،قبضہ کے خاتمے کیلئے کمپیوٹرائزڈ لینڈ رجسٹریشن اور مخصوص عدالتیں ، قومی ائیر لائن کی فوری بحالی اور اوورسیز انٹرنیشنل کنونشن کا انعقاد کروانے پر بات کی تھی جس پر وزیراعظم پاکستان،وزیر خزانہ اور گورنر پنجاب نے آمادگی ظاہر کی ہے اور غور کرنے کا وعدہ کیا ہے۔
انہوں نے کہا کہ تارکین وطن کیلئے فون کی سہولت ، کراچی میں رکے کنٹینرز اور ڈیڈ باڈی کی ترسیل کیلئے بھی معاملات کو مذکورہ محکموں سے اٹھانے کی ضرورت ہے۔وزیراعظم پاکستان میاں محمد شہباز شریف نے بیرسٹر امجد ملک کو تفصیلی ملاقات کیلئے اسلام آباد آنے کی دعوت دی جو انہوں نے قبول کرلی۔
