قومی ٹیم کے کپتان بابراعظم کے مداحوں نے انگلش ویمن کرکٹ ٹیم میں اپنی ’بھابھی‘ ڈھونڈ لی – Kashmir Link London

قومی ٹیم کے کپتان بابراعظم کے مداحوں نے انگلش ویمن کرکٹ ٹیم میں اپنی ’بھابھی‘ ڈھونڈ لی

لندن(سپورٹس ڈیسک) انسان جب شہرت کی بلندیوں پر پہنچتا ہے تو اسکا اندازہ صرف اسکے کام سے نہیں بلکہ نام سے بھی کیا جاتا ہے، کھیل ایک ایسا شعبہ ہے جہاں کوئی بھی انسان اچھی کارکردگی کی بنا پر چنوں میں شہرت کی بلندیوں کو چھو لیتا ہے اور تب اسکے بارے افواہوں کا بازار بھی گرم ہوجات ہے۔ ایسا ہی انگلینڈ میں موجود پاکستان کی قومی کرکٹ ٹیم کے کپتان بابر اعظم کیساتھ ہوا۔

انگلینڈ کے خلاف پہلے ٹی ٹوئنٹی میچ میں بہترین پرفارمنس دکھانے والے قومی کرکٹ ٹیم کے کپتان بابر اعظم کی انگلش ویمن کرکٹر ڈینیئل ویٹ کی جانب سے تعریف کئے جانے پر سوشل میڈیا پر مختلف تبصرے زیرِ گردش ہیں۔

انگلش ویمن کرکٹر ڈینیئل نے ٹوئٹر پر جاری کئے گئے اپنے ایک پیغام میں بابر اعظم کا نام لکھا تھا اور اس کے ساتھ حیرانی اور تالیاں بجانے کی ایموجی کا استعمال بھی کیا تھا۔

انگلش ویمن کرکٹر کے اس ٹوئٹ پر پاکستانی صارفین کے تبصروں کا تانتا بندھ گیا ہے۔ کوئی انہیں مستقبل کی ’قومی بھابھی‘ قرار دے رہا ہے، کسی نے ڈینیئل کے نام کے ساتھ بابر اعظم کا نام جوڑ دیا تو کسی نے بابر اعظم کو شادی کی مبارک باد دے دی۔

نوید عباسی نامی صارف نے لکھا ہے کہ ’لگتا ہے خاتون آپ بابر اعظم کے عشق میں مبتلا ہو گئی ہیں۔‘ ایک صارف نے کہا کہ ڈینیئل کے اکاؤنٹ سے ایک ٹوئٹ پر 5 یا 6 ہزار لائکس آتے تھے لیکن بابر اعظم کے نام کے ٹوئٹ پر انہیں اب تک 23 ہزار لائیکس آچکے ہیں، یہ بابر اعظم کے نام کا ہی کمال ہے۔

واضح رہے کہ ایک روزہ میچز کی سیریز میں شکست کے بعد قومی ٹیم نے انگلینڈ کی ٹیم کے خلاف شاندار کم بیک کرتے ہوئے ہوم ٹیم کو پہلے ٹی ٹوئنٹی میچ میں شکست دی تھی۔ اس میچ میں بابر اعظم نے 85 رنز کی شاندار اننگز کھیلی جبکہ محمد رضوان کے ساتھ انہوں نے 150 رنز کی پارٹنر شپ بھی بنائی۔

50% LikesVS
50% Dislikes