عمران خان کے بچوں سے متعلق بیان پر جمائما اور مریم نواز آمنے سامنے – Kashmir Link London

عمران خان کے بچوں سے متعلق بیان پر جمائما اور مریم نواز آمنے سامنے

لندن (عدیل خان) وزیر اعظم عمران خان کی سابق اہلیہ جمائما گولڈ اسمتھ المعروف جمائما خان نے پاکستان مسلم لیگ (ن) کی نائب صدر مریم نواز کی جانب سے ان کے بچوں سے متعلق بیان پر ردعمل دیتے ہوئے کہا ہے کہ 2004 میں پاکستان چھوڑنے کے بعد بھی مذہب مخالف حملے اب تک جاری ہیں۔

جمائما گولڈ اسمتھ نے سماجی رابطے کی ویب سائٹ ٹوئٹر پر کی گئی ٹوئٹ میں کہا کہ ’مریم نواز شریف نے یہ اعلان کیا ہے کہ میرے بچے یہودیوں کی گود میں پلے ہیں‘۔ انہوں نے مزید لکھا کہ ’میں نے ایک دہائی تک میڈیا اور سیاستدانوں کی جانب سے یہود مخالف حملوں (اور ہفتہ وار قتل کی دھمکیوں اور میرے گھر کے باہر مظاہرے) کے بعد 2004 میں پاکستان چھوڑ دیا تھا لیکن یہ سلسلہ اب تک جاری ہے‘۔

خیال رہے کہ جمائما نے یہ بیان پاکستان مسلم لیگ (ن) کی نائب صدر مریم نواز کی جانب سے آزاد کشمیر کے جلسے میں دیے گئے ایک بیان کے ردعمل میں جاری کیا تھا جو مریم نواز نے وزیراعظم کے خطاب کے جواب میں دیا تھا۔ وزیراعظم عمران خان نے 18 جولائی کو آزاد کشمیر کے ضلع میر پور میں جلسے سے خطاب کرتے ہوئے نواز شریف کے نواسے جنید صفدر پر تنقید کی تھی۔

انہوں نے کہا تھا کہ ’کمزور جیلوں میں جائے اور طاقتور این آر او لے لے اور باہر جاکر بیٹھ جائے اور اپنے پوتے کا پولو میچ دیکھے، یہ پوتا جو برطانیہ میں پولو میچ کھیل رہا ہے، کشمیر کے کتنے لوگ باہر رہتے ہیں کبھی ان سے پوچھیں کہ وہاں کس طرح کے لوگ پولو کھیلتے ہیں، یہ بادشاہوں کا کھیل ہے عام آدمی نہیں کھیل سکتا، اس کے لیے بہت پیسہ چاہیے تو اس کے پاس اتنا پیسہ کہاں سے آیا؟ یہ آپ کا پیسہ ہے جو یہاں سے باہر گیا ہے‘۔

جس کے بعد اسی روز 18 جولائی کو آزاد کشمیر کے علاقے دھیر کوٹ میں مسلم لیگ (ن) کے انتخابی جلسے سے خطاب کرتے ہوئے مریم نواز نے اپنے بیٹے پر کی گئی تنقید کا جواب دیا تھا۔ انہوں نے کہا تھا کہ وہ تو آج وہاں کی پولو کی ٹیم کا کپتان بن کر پاکستان کی عزت میں اضافہ کررہا ہے۔

مریم نواز نے کہا کہ ’عمران خان کہتے ہیں کہ وہ پوتا، وہ پوتا نہیں نواسا (جنید) ہے، وہ نواسا باہر جا کر پولو کھیل رہا ہے، کہتے ہیں کہ اس کے پاس پولو کے پیسے کہاں سے آئے’۔ انہوں نے مزید کہا تھا کہ ’میں بچوں تک نہیں جانا چاہتی تھی لیکن جیسی بات کریں گے اب منہ توڑ جواب ملے گا، وہ نواز شریف کا نواسا ہے، گولڈ اسمتھ کا نواسا نہیں، وہ نواز شریف کا نواسا ہے، یہودیوں کی گود میں نہیں پل رہا’۔

ایک دوسرے پر تنقید کا یہ سلسلہ ا ب تک جاری ہےمریم نوازنے وزیراعظم عمران خان کی سابقہ اہلیہ جمائما گولڈ اسمتھ کے بچوں کے بارے میں دیے گئے بیان پرسامنے آنے والے سخت ردِعمل کا جواب د یتے ہوئے جمائما گولڈ اسمتھ کو مخاطب کرتے ہوئے کہا کہ مجھے آپ کی اور آ پ کے بیٹوں کی ذاتی زندگی میں کوئی دلچسپی نہیں،میرے پاس اور بہت کچھ کہنے اور کرنے کو ہے۔

انہوں نے مزید کہا کہ آپ کے سابق شوہر دوسروں کی فیملیز کے بارے میں زہر اگلتے رہتے ہیں۔ وہ یہ کرتے رہیں گے تو دوسروں کو بھی حربے استعمال کرنے آتے ہیں۔ مریم نواز نے جمائما سے کہا کہ وہ اس سب کا ذمہ دار اپنے شوہر کو ٹھہرائیں۔

50% LikesVS
50% Dislikes