سترہ سال بعد پاکستان کا دورہ کرنے والی انگلش کرکٹ ٹیم کے اعزاز میں وزیر اعظم پاکستان کا استقبالیہ

لندن (مسرت اقبال) سترہ سال بعد پاکستان کا دورہ کرنے والی انگلینڈ کرکٹ ٹیم کے اعزاز میں وزیر اعظم پاکستان میاں محمد شہباز شریف نے ایک استقبالیہ تقریب کا اہتمام کیا جس میں پاکستان اور انگلینڈ کی ٹیموں کے کھلاڑیوں سمیت دیگر آفیشلز نے شرکت کی۔ اس موقع پر وزیر اعظم نے پاکستان کرکٹ کے لیے انگلینڈ کی حمایت کو سراہا اور شاندار کھیل کا مظاہرہ کرنے پر ٹیم کی تعریف کی۔ وزیراعظم نے نوجوان کرکٹرز کو کرکٹ میں پاکستان کے شاندار ماضی کے بارے میں بھی بتایا اور اس حوالے سے اظہر محمود، مرحوم حنیف محمد (لٹل ماسٹر) اور آصف محمود کا ذکر کیا جنہوں نے کرکٹ کی دنیا میں بڑی شہرت حاصل کی۔
وزیر اعظم شہباز شریف نے کرکٹ کو پاکستان اور برطانیہ کے درمیان یکساں جوش و جذبہ کا حامل شعبہ قرار دیتے ہوئے کہا کہ انگلینڈ کی کرکٹ ٹیم کا دورہ پاکستان دونوں ممالک کے درمیان روابط کو فروغ دینے میں بہت مددگار ثابت ہوگا۔ وزیر اعظم وزیراعظم نے کہا کہ پاکستان کے برطانیہ کے ساتھ شاندار تعلقات ہیں اور برطانوی ٹیم کا دورہ دونوں ممالک کے درمیان روابط کے فروغ کے لئے دورس نتائج کا حامل ثابت ہو گا۔ برطانیہ نے تعلیم اور صحت کے شعبوں میں ڈی ایف آئی ڈی کے ذریعے سرمایہ کاری کرکے جمہوریت اور فلاح و بہبود کے لیے ہمیشہ عوام کا ساتھ دیا ہے۔ وزیر اعظم نے انگلینڈ کی ٹیم کو پاکستان کے خلاف تین ٹیسٹ میچوں کی سیریز کے پہلے میچ میں جیت پر مبارکباد دی لیکن ساتھ ہی یہ بھی کہا کہ گرین شرٹس اگلے میچ میں کم بیک کریں گے۔
علاوہ ازیں اپنے ٹوئٹ میں وزیراعظم محمد شہباز شریف نے کہا ہے کہ کرکٹ ایک مشترکہ جذبہ ہے جو پاکستان اورانگلینڈدونوں ممالک کے درمیان قریبی تعلقات کومضبوط کرتا ہے۔انہوں نے کہا کہ آج شام کو وزیراعظم ہاؤس میں انگلینڈ اور پاکستان کی کرکٹ ٹیموں کی میزبانی کرنا بہت اچھا رہا۔ کرکٹ ایک مشترکہ جذبہ ہے جو ہمارے دونوں ممالک کو قریبی رشتے میں منسلک کرتاہے۔